Wi över uns

De Grupp, de sick hüüt "Plattdütsche Bühne Gettorf-Lindau" nennt, worr 1931 as "Gettorfer Speeldeel" grünnt. Dat lött sick ut de Popiern, de vörliegt, rutlesen.
Speelt worr in Fröhjohr un in Harvst för alle möglichen Vereene un Lüüd. In Januar 1937 hett de NSDAP de Speeldeel verboden. Af Juni 1947 hebbt 13 Lüüd de Speeldeel wedder int Leben ropen.
Speelt hebbt se in veele Gemeinden in unse Kreis Eckernföör. Siet 1954 nennt sick de Speeldeel "Plattdeutsche Bühne Gettorf". De Baas weer bit 1954 Walter Trede, bit 1976 Hans Johannsen un bit 1993 Betty Herterich, de as Eenzelne mit de "Silberne Mühle", de Kulturpries vun de Gemeende Gettorf uttechnet wurrn is för eer Verdeenste üm dat Plattdütsche Theoter un de Plattdütsche Sprook.
Vun 1993 bit 2002 weer Harald Neumann de Baas. Bit 1993 wurr övert Johr een 1-Akter un een 3-Akter opführt. Intwischen bringt wi blots een Dree-Akter to Opföhrung, over dat mit veel Erfolg(10-13 Vörstellungen int Johr). Vun 2002 bit 2006 weer Johannes Greve de Baas. Vun 2006 bit 2012 hett Harald Neumann dat Stüür wedder in de Hand hat. Siet Ende de Saison 2012 is Knud Matthießen de niee Baas.
Wi speelt in Gettorf , in Großkönigsförde (Gemeinde Lindau) un in Revensdorf. De Stammbesettung kümmt oder stammt ut de Gemeende Lindau, so dat ut de Nom "Plattdeutsche Bühne Gettorf" de Nom "Plattdütsche Bühne Gettorf-Lindau" wurrn is.
Uns fehlt, wi annere Bühnen ok, de Nachwuchs. Mit Begeisterung sünd wi over dorbi, so dat dat Amateurtheoter bliem warrt. Un wenn de Stimmung in de Grupp so gut blifft, wi se is, denn warrt sick doran hoffentlich ok nix ännern...